【明報專訊】就嚟又到聖誕節，又係時候佈置聖誕樹同掛飾物。Emily仲記得，立法會 議員喺去年財政預算案辯論中提出多到數唔晒嘅訴求，將個議案愈變愈長，財爺曾俊華 因此嘲諷議員當預算案係「聖誕樹」，掛晒自己喜愛嘅飾物；不過，今年底相信議員會再次送上「聖誕樹」畀政府做禮物！
阿基動議 惹來「一拖四」
Emily見聽日立法會大會議程中，民協馮檢基 提出一個有關幫助基層嘅動議，佢提議重設扶貧委員會，但引來4名議員「掛上」自己嘅訴求﹕民建聯 譚耀宗 提出修訂，促請政府全面落實財爺07年發表嘅扶貧委員會報告內嘅建議，民主黨 黃成智就叫政府開設中低層新職位等，專業會議梁美芬就叫當局推行短期食物援助計劃，勞聯李鳳英就希望暫停徵收預繳稅。不過，今次坐定定喺議事廳接「聖誕樹」嘅唔係財爺，而係勞工及福利局 長張建宗 。
