【明報專訊】上個禮拜Emily先同大家講過，勞工及福利局 長張建宗 喺立法會 嘅暫緩收取外傭稅討論中被指「疑似拉登」，話佢「攞住個核子彈周圍嚇人」。噚日，局長滿心歡喜諗住宣布暫緩收取期延至5年，應該會贏得掌聲，點知繼續遭議員狂轟。
李卓人 ﹕政府又想開戰
職工盟李卓人先發炮，指政府可以自行修訂，無必要重新刊憲，令立法會多做一輪工夫，又想再開戰！一聽到「開戰」兩個字，局長就嗱嗱聲話：「我唔想有任何戰場，我唔想打仗，我個人好溫和！」
炮火除咗瞄準局長外，火頭亦燒到民建聯 身上，阿人窒民建聯做保皇黨做到出神入化，做埋政府「試探氣球」，先由民建聯提出暫緩5年嘅建議，唔夠一個禮拜，政府就據為己有。民建聯副主席葉國謙 忍唔住反駁﹕「議員發言時提民建聯唔緊要，但唔好提『保皇黨』，唔好『搵交嗌』。」民主黨 黃成智隨即加入戰團，佢話﹕「人哋話你，就咁大反應，你都成日叫我哋民主派 做『反對派』，我哋都無出聲。」
一向惹火嘅獨立議員葉劉淑儀 身為小組委員會嘅主席，噚日無加入戰團，不過喺臨散會前，就好感慨咁話﹕「今次我出師未捷會先休，下次都未必輪到我做主席啦！」
