【明報專訊】今年重返立法會 嘅民主黨 黃成智，噚日係施政報告致謝議案中就賭博政策首度發言，責怪馬會無履行當日承諾，無喺波飛上印有沉迷賭博後果嚴重嘅字句。佢喺議事廳內炮轟一輪後，又走出走廊，繼續喺Emily面對大鬧馬會不是，又話民政事務局 無好好監管。
以為主席仲係夏佳理
成智鬧得㷫起之時，仲話會約夏佳理傾吓，但聽到呢度Emily開始覺得唔對路，夏佳理已經唔係馬會主席喎，搵佢做乜？於是，Emily提佢，家馬會主席係陳祖澤 ，成智只好尷尬咁改口話約陳祖澤啦。
其後，Emily翻查賭博條例，發現法例只規定馬會要喺投注站內，張貼沉迷賭博後果嚴重嘅字句，無話要印喺波飛上。成智再一次搞錯，睇嚟這位「翻叮」議員要惡補吓賭博政策，免得再次出錯。
