【明報專訊】已經退下火線嘅民主黨 「民主之父」李柱銘 ，今年6月就係七十大壽，啱啱夠資格唔需要資產審查都可以攞生果金。Emily唔知馬丁有無即時去申請，不過，佢黨友黃成智就建議話，馬丁好應該攞呢份「敬老金」，否則日後要審查嘅話，就再無機會攞。
搵長者靜坐抗議審查 醫生standby
成智仲話，下個禮拜二會搞個絕食靜坐大行動，抗議生果金增設審查，「希望搵到約200個長者，輪流喺立法會 門外靜坐支援，直至禮拜五立法會辯論完畢」。佢計劃，到時會「落場」絕食，有咗去年12月為爭取2012年雙普選 絕食4日嘅經驗，今次應該無問題。
不過，穩陣起見，成智會請幾個護士在場standby，萬一絕食者或者靜坐嘅公公婆婆有咩頭暈身熱，都有人睇住。
唔單止民主黨，連建制派都對特首話要考慮就生果金引入審查感到不滿，工聯會 王國興將會為建制派「處女下海」，首次修改施政報告致謝動議嘅措詞，字眼包括「強烈要求」生果金增加至1000元，取消引入入息或資產審查，並增設「清貧長者生活補助金」。而民建聯 主席譚耀宗 更表明，一定會支持工聯會嘅修訂。
