【明報專訊】今時今日嘅政治人，賣相都好重要，Emily有日睇電視新聞，見到社工出身嘅民主黨候任立法會議員黃成智一頭烏黑髮絲，即刻忍唔住嗌咗句「乜咁黑嘅」！
Emily忍唔住同成智講笑，問佢幾時學咗曾江，將頭髮「逐漸變黑」，佢就話，依家做番議員，自然要顧及形象，畀人覺得有朝氣有活力先得，所以佢決定染吓髮，起碼望上去唔會咁蒼老；至於喺競選時幫民主黨班四十世代做形象設計嘅劉天蘭，建議佢戴副眼鏡，成智話佢都會keep住呢個look，皆因睇落去穩重啲，又可以遮住個眼肚咁話。
繼續戴眼鏡遮眼袋
千辛萬苦重返議會，成智都好緊張要有所表現，唔係下次選民就會唾棄佢，所以佢諗住下個禮拜喺粉嶺搞完各界友好慶功宴後，就要好好準備應付議員嘅工作。
