由民主黨黃成智擔任主席、倡導一夫一妻制「家庭發展網絡」噚日搞個遊行，但就遇到一批同志組織成員加入，但成智原來一早有準備，自行控制「家網」出席遊行人數，避免發生衝突咁話。
曾反同性婚姻惹不滿
之前政府提出《家庭暴力條例》修訂時，加入保障同性同居者，身為基督徒黃成智就認為，修訂變相承認同性婚姻，因此曾提出反對，要求更改修例字眼，結果遭同志組織大肆抨擊。
噚日成智同約20名「家庭發展網絡」執委，著住粉藍T恤中環遮打花園起步，但約10名舉住彩虹旗同志組織成員突然到場「聲援」，仲搶佔前面有利位置搖旗吶喊，「家網」嗌句﹕「健康家庭是民主基石」，同志們就和應一句﹕「愛同志家庭」。
行到去政府總部，同志們更載歌載舞，黃議員在鏡頭前都顯得落落大方，只好行埋一邊接受傳媒受訪，但同志繼續步步進迫，拉起彩虹旗企成智背後，同佢鬥搶鏡。其中一名同志話，佢其實係響應「家網」呼籲，絕非踩場。不過，黃成智事後表示，其實一早已收到風話有同志到場，所以已臨時叫其他支持者留到七一再行，希望減少人數避免衝突。
|
