【明報專訊】外國人有句話叫「Try our best, and God will do the rest」（我們做到最好，剩下的上帝會搞掂），近日政壇都吹起祈禱風、搵上帝幫幫手，好似民主黨黃成智咁，噚日報名參選前，就同助選團齊齊禱告。
黃成智都算係低調祈禱，冇特登搵記者去影相，Emily記得參選九龍西嘅西九新動力主席梁美芬就高調啲，早前宣布參選嘅記者會，就喺一眾記者面前圍圈祈禱，話要「願佢嘅溫柔化解戾氣」。
黃成智噚日都帶埋太太出嚟，兩公婆人前人後大賣恩愛。黃太話，梗係會希望老公陪多啲自己，不過都會尊重同埋支持老公嘅理想，所以就算因為選舉少咗時間陪自己，都唔介意。
